Türkiyə prezidenti Rəcəb Tayyip Ərdoğan dünən ABŞ-a səfəri zamanı Ağ Ev rəhbəri Donald Trampla görüşüb. Ağ Evdə baş tutan görüşdən sonra iki ölkənin prezidenti birgə mətbuat konfransı keçirib.

ABŞ-a səfərinə böyük önəm verdiyini söyləyən Rəcəb Tayyip Ərdoğan, PKK və PYD silahlı qruplarına dəstəyin dayandırılmasını istəyib: "Regionumuzun gələcəyində terror təşkilatlarına yer yoxdur. Terror təşkilatları ilə prinsipli və qətiyyətli mübarizə məsələsində keçmişdə baş verən səhvləri kompensasiya edəcək addımların davamının gələcəyinə ümid edirik. Xüsusilə YPG/PYD terror təşkilatının hansı ölkə tərəfindən olursa-olsun tərəf müqabili kimi qəbul edilməsi qlobal səviyyədə əldə edilən razılaşmlara qətiyyən uyğun deyil. Cənab Trampı seçkilərdə əldə etdiyi tarixi qələbə üçün bir daha təbrik edirəm. Strateji tərəfdaşlıq səviyyəsindəki əlaqələri müzakirə etdik. Aramızdakı münasibətləri güclü saxlamağımız qlobal sülh və sabitlik üçün əhəmiyyətlidir. Təlatümlü bu dövrdə yaxın əməkdaşlıq çox əhəmiyyətlidir. Bu səfərimiz tarixi bir dönüş nöqtəsi təşkil edəcək".
 
Donald Tramp isə mətbuat konfransında deyib ki, Türkiyə ilə əlaqələrə çox önəm verir və rəsmi Ankara ilə terror təşkilatlarına qarşı mübarizədə birgə mübarizə aparmağı düşünür: "ABŞ və Türkiyə arasında keçmişə əsaslanan köklü əlaqələr mövcuddur. Koreya Müharibəsində türk və amerikan əsgərləri çiyin-çiyinə döyüşüb. Müharibələrdə türklərin cəsarəti əfsanəvidir. Bu gün də yeni bir terror təhdidi ilə üzləşmişik və bu ümumi düşmənə qarşı yenə birgə mübarizə aparacağıq. PKK və İŞİD kimi terror qruplarına qarşı mübarizədə Türkiyəyə dəstək verəcəyik".