NATO-nun 15 ölkəsi Əfqanıstana əlavə qoşun göndərəcəyini elan edib. FaktXeber.com-un verdiyi məlumata görə, bu barədə NATO-nun baş katibi Yens  Stoltenberq  alyansın müdafiə nazirləri ilə görüşündə bəyan edib.

«Mən təsdiq edirəm ki, NATO  Əfqanıstanda hərbi mövcudiyyətini gücləndirir. 15 ölkə əlavə  qoşun ayıracağını elan edib və mən bu gün  daha çoxunu gözləyirəm. Söhbət hərbi missiyanın icrasına qayıtmaqdan deyil, milli qüvvələrin hazırlanması və yardım üzrə  NATO msissiyasının birləşdirilməsindən gedir», - deyə o, bildirib.

Yens Stoltenberqin sözlərinə görə, Əfqanıstanda NATO əməliyyatları komandanlığı ümumilikdə 4 minə yaxın hərbçinin ayrılması üçün sorğu göndərib.

Qeyd edək ki, NATO 2014-cü ildə Əfqanıstandan döyüş qüvvələrinin çıxarılmasını başa çatdırıb. Həmin vaxtdan ölkədə alyansın 13,5 min nəfərdən ibarət «Qəti dəstək» (Resolute support) missiyası fəaliyyət göstərir. 

Bununla belə, son illər  hökumətə qarşı çıxan «Taliban» terror təşkilatı Əfqanıstanın 40 faiz ərazisini öz nəzarətinə qaytara bilib. Bundan əlavə, 2015-ci ildən bəri  Əfqanıstanda İŞİD terror təşkilatı ilə əlaqədar silahlı qruplaşmaların fəaliyyti artıb. Onlar həm Əfqanıstan hökumətinə, həm də taliblərə qarşı döyüşürlər.