Suriyanın İdlib şəhərində baş verən silsilə partlayşlar nəticəsində onlarla insan, o cümlədən dinc sakinlər həlak olub.Bu barədə “Şaam” portalı xəbər yayıb.

Bildirilir ki, intiharçının idarə etdiyi minalanmış avtomobil “Təhrir əş-Şam” ("Cəbhət ən-Nusra") terror qruplaşmasının  hərbi konvoyuna çırpılıb. Bundan sonra silsilə partlayışlar baş verib. Şahidlərin sözlərinə görə, sonrakı partlayışlar maşın karvanında olan partlayıcıların detonasiyası nəticəsində baş verib.

Qurbanlar barədə müxtəlif məlumatlar verilir. “Şaam” portalına görə, silsilə partlayıçlar nəticəsində 14 nəfər ölüb,  onlarla insan yaralanıb. Ölənlər arasında həm silahlı qruplaşma üzvləri, həm də mülki vətəndaşlar olub.

Livanın “Əl Məyadin” qəzeti isə dinc sakinlər də daxil olmaqla  50-dən artıq ölü sayının olduğunu bildirib.

Qeyd edək ki, şənbə günü İdlibdə  “Cəbhət ən-Nusra”nın (“Hayat Təhrir əş-Şam”) əsasını qoyanlardan Əbu Muhamməd əl-Şuxaylənin cəsədi aşkarlanıb. Yaşayış məntəqəsində olan mənbələrin çoxu bildirir ki, onu zəhərləyiblər.

“Təhrir əş-Şam” hələ ki, bununla bağlı bəyanat verməyib.Lakin qruplaşmanın bir sira üzvləri  sosial şəbəkələrdə komandirlərinin ölümünün arxasında  “Hərəkat Əhrar əş-Şam”ın dayana biləcəyini bildirir.

Xatırladaq ki, “Ən-Nusra” bu yaxınlarda “Əhrar-əş-Şam”a alçaldıcı barışıq imzalatmışdı.