Kolumbiyada 52 ildir davam edən müharibə rəsmən başa çatıb. Kolumbiya İnqilabçı Silahlı Qüvvələrinin (FARC) tam tərksilah olunduğunu açıqlayan dövlət başçısı Xuan Manuel Santos, üsyançılarla hökumət arasındakı müharibənin sona çatdığını elan edib.

Beləcə Qərb yarımkürəsinin ən uzun müddət davam edən silahlı toqquşması sona çatıb. "FARC" döyüşçüləri əlindəki son silahları bu gün keçirilən tədbirlərdə təhvil verib.

"Bu gün müharibənin son nəfəsini eşitdik. Silahları təhvil verməklə yanaşı müharibə həqiqətən də qurtardı və xalqımızın həyatında yeni mərhələ başladı",-deyə Kolumbiya prezidenti bildirib. 

Qeyd edək ki, 48 milyondan çox əhalisi olan Latın Amerika ölkəsi Kolumbiyada 1964-cü ildən davam edən qarşıdurmalarda 260 minə yaxın insan həyatını itirmiş və 6 milyondan çox vətəndaş evindən didərgin düşümüşdü.