Suriyanın şimalında yerləşən və İŞİD terror təşkilatının nəzarətində olan Rəqqa şəhərinin mərkəzinə beynəlxalq koalisiyaya daxil olan ABŞ təyyarələri tərəfindən keçirilən hava hücumlarında 27 mülki vətəndaşın dünyasını dəyişdiyi bildirildi.

ABŞ-ın rəhbərlik etdiyi koalisiya son 48 saat ərzində Rəqqa şəhərinin mərkəzinin mühasirə altındakı bölgəsinə 133 hava zərbəsi endirib. 

Hava hücumları zamanı Rəqqanın "Ağ Bağ" məhəlləsindəki bir binaya endirilən zərbə zamanı 17 mülki vətəndaş öldürülüb. 

Daha sonra endirilən hava zərbəsi zamanı isə bir ailənin 10 üzvü dünyasını dəyişib.

İŞİD əleyhinə koalisiya və PKK terror təşkilatının Suriya qolu olan PYD-nin Rəqqa şəhər mərkəzinə yönələn hücumlarına görə təxminən 450 min vətəndaş evlərini tərk etmək məcburiyyətində qalıb. Şəhər mərkəzindəki qarşıdurmalara görə isə təxminən 30 min mülki vətəndaş mühasirədə qalıb.