Türkiyə prezidenti Rəcəb Tayib Ərdoğan və Fransa prezidenti Emmanuel Makron İraq Kürdüstanının müstəqilliyi ilə bağlı  referendumun keçirilmə perspektivləri ilə əlaqədar birgə reaksiya təşəbbüsü hazırlayır.Bu barədə HaberTurk diplomatik mənbələrə istinadla xəbər yayıb.

Bildirilir ki, Ərdoğan Nyu-Yorkda BMT Baş Assambleyasında  Makronla bu məsələni geniş müzakirə  etmək  və üçpilləli  fəaliyyət planı təklif etmək istəyir.

Həmçinin baxın

“Kürdüstan referendumu”nu izləmək bizə problem yarada bilər” - Xəbərdarlıq

Ankara tərəfindən reaksiya tədbirlərinin (sanksiyalar) konkret  məzmunu sentyabrın 22-də Türkiyədə Milli Təhlükəsizlik Şurasının  iclasında səsə qoyulacaq.

Buna kimi isə Ərdoğan Parisə ilk addım kimi sentyabrın 25-də referendum keçirməmə barədə Ərbilə birgə çağırış etməyi təklif edib.

Əgər İraq Kürdüstanı bununla razılaşarsa, Ankara və Paris rəsmi Bağdad və kürdlər arasında xalqın konstitusyon hüquqları, mübahisəli regionlar (məsələn, Kərkük) məsələsində vasitəçi kimi çıxış edəcək və bu təşəbbüsün ikinci maddəsi olan uyğun yol xəritəsi hazırlayacaq.

Ərbil səsverməni ləğv etməsə, Türkiyə Parisə İraq Kürdüstanına  qarşı bir sıra sanksiyalar irəli sürmək barədə təklif irəli sürəcək. Bu təşəbbüsün üçüncü mərhələsi olacaq. Ankara hesab edir ki, iki ölkənin də reaksiya tədbirləri oxşar, yaxud eyni olmalıdır. 

Həmçinin Ankara  bu təşəbbüsü  ikitərəfli görmür, hətta  iraq kürdlərinin  referendum məsələsinə təsir etmək istəyən istənilən ölkəni qoşula biləcəyini bildirir.

Yeri gəlmişkən qeyd edək ki, Türkiyə Baş Qərargahı  bu gün  İraqın şimalında  kürd  muxtariyyəti ilə sərhəddə hərbi təlimlərə başladığı barədə elan edib.

Xatırladaq ki, İraq Kürdüstanı sentyabrın 25-nə müstəqillik referendumu keçirmək istəyir. Bağdad buna qarşı çıxır və referendum zorakılığın artmasına gətirəcəyi halda İraqın baş naziri  Heydər əl-Abadi hərbi müdaxiləni istisna etməyib. Bununla belə baş nazir  Ərbillə danışıqlardan imtina etməyəcəyini bildirib.