Qırğızıstan prezidenti Almazbek Atambayev Soçiyə MDB dövlətlərinin iclasına səfərini təxirə salıb. Səbəb isə gözlənilən prezident seçkiləri ərəfəsində ayrı-ayrı siyasətçilər tərəfindən  qarşıdurma və ölkədə çevrilişə cəhd faktorlarının ortaya çıxması olub.

Qırğızıstan Mətbuat Xidməti bu barədə məlumat yayıb.

«Seçkilər günü ayrı-ayrı siyasətçilər  tərəfindən kütləvi iğtişaşlar hazırlama, həmçinin bu siyasətçilərin xaricdən maliyyələşməsi ilə bağlı ortaya çıxan faktlara görə, prezident ölkədə  asayişə və təhlükəsizliyə şəxsən nəzarət etmək üçün öz iş səfərini  təxirə salmaq qərarını alıb», - deyə məlumatda bildirilir.

Qeyd edək ki, Atambayev oktyabrnı 10-11-i  Soçiyə getməli idi. Atambayevin əvəzinə  Qırğızıstan  nümayəndəliyinə baş nazir  Sapar  İsakov rəhbərlik edəcək.

Atambayev bundan əvvəl  Qazaxıstan  rəhbərliyini ölkənin daxili işlərinə  qrışmaqda ittiham etmişdi. Prezidentin  fikrincə, Astana  Qırğızıstan prezidenti vəzifəsinə müəyyən olunmuş namizədi dəstəkləyir.