Çexiyanın baş naziri Boquslav Sobotka ölkə başçısına etiraz edib. Buna səbəb prezident Miloş Zemanın AŞPA-da çıxışı zamanı Krımla bağlı Rusiyaya dəstək nümayiş etdirməsi olub. 

Çexiya prezidenti çıxışı zamanı bildirib ki, Ukraynanın Krımı qaytarmaq cəhdi Avropada müharibəyə səbəb olub, halbuki Kiyev Rusiyadan kompensasiya almaqla yarımada ətrafında yaranan problemi həll edə bilərdi. "Krımın Rusiyaya birləşdirilməsi baş vermiş faktdır",-deyə Miloş Zeman bildirib. 

Çexiyanın hökumət rəhbəri Boquslav Sobotka qeyd edib ki, dövlət başçısının Krımla bağlı çıxışı ölkənin mövqeyini əks etdirmir və Avropa Birliyinin Rusiyaya qarşı sanksiyaları Minsk razılaşmasının şərtlərinə əməl etməkdən asılıdır.