Gənc müğənni Damla: “Daha çox Rusiyadan toy dəvətləri alıram”

Gənc müğənni Damla (Məsumə Məmmədova) müsahibə verib, şəxsi həyatı və yaradıcılığı ilə bağlı məqamlara toxunub.  Həmin müsahibəni təqdim edirik:

- Rusiyadan deportasiya olunmağınız ilə bağlı məlumatlar yayılmışdı. Özünüz də açıqladınız ki, Kan Abdullayev bu işdə sizə köməklik göstərib. Maraqlıdır, deport olunmağınızın səbəbi kimi nə göstərilirdi?

- Bu haqda yetərincə çox yazılıb. Təkrarən danışmaq istəmirəm.

- Amma səbəbi haqda danışmamısız?

- Səbəb kimi Rusiyaya çox giriş-çıxış etidiyimi, bu həddi aşdığımı göstərirdilər. Amma bu, sifarişli məsələ idi. Yəni  sifarişlə mənə deport qoyulmuşdu.

- Yeni çəkilən klipinizə gələk, “Fırtına” mahnısına vətənpərvərlik ruhda klip çəkmək ideyası necə yarandı?

- Bu, mənim öz ideyamdır və rejissora bu ideyanı özüm irəli sürmüşəm. Çünki mahnıda “gəl çarəm” sözü var. El arasında belə bir söz var, “ölümdən başqa hər şeyə çarə var”. Yəni çarəsizlik olan ölümdürsə, düşündüm ki, maraqlı klip çəkib, əsgər gedən sevgilisini gözləyən xanımın obrazını canlandıraq. Onun sonda şəhidlik məktubu almasından böyük çarəsizlik nə ola bilər...

- Bəs özünüz həyatda çoxmu çarəsiz qalmısız?

- Nə qədər güclü qadın olsam da, öz ayaqlarım üzərində dayanıb, maddi-mənəvi cəhətdən işlərimin öhdəsindən gəlsəm də, bəzən mənim də tükəndiyim və çarəsiz qaldığım zamanlar olur. Mənim də dizimi yerə qoyub, köks ötürdüyüm zamanlar olub. Digər qadınlar kimi, mənim də hisslərim, duyğularım var. Amma əsas odur ki, mən o çarəsizlik məqamlarını adlayıb, keçə bilirəm.

- Son vaxtlar sanki bir qədər emosional görünürsüz. Sanki nədənsə incimisiz...

- Əslində xarakterim belədir, duyğusal insanam. Yəni hər zaman beləyəm, “gözümün yaşı ovcumun içindədir”.

- Bir müddət bundan əvvəl meyxanaçı Pərviz Bülbülə ilə ekspromt duet oxudunuz. Amma nədənsə bu dueti yazdırmadız. Səbəb nə idi? Ümumiyyətlə hazırda Pərviz Bülbülə ilə münasibətləriniz necədir?

- Pərviz mənim duet ortağım deyildi. Biz bu dueti etdik və çox gözəl ki, hazırda bunu digərləri davam etdirir. Bizdən əvvəl bu cür dueti Aygün Kazımova Namiq Qaçuxurlu ilə etmişdi. Həmçinin Könül Kərimovanın da belə bir dueti vardı. Bizdə isə tam təsadüf nəticəsində, ekspromt oldu. Hazırda Pərvizlə münasibətlərimiz yaxşıdır.

- Bəziləri qeyd edir ki, sənətə mərhum müğənni Şəfanın mahnıları ilə gəlməyiniz sizə uğur qazandırıb.

- Xeyr, bu doğru fikir deyil. Bəli, mən Şəfanın bir mahnısını oxumuşam, amma məhz onun mahnıları ilə sənətə gəlməmişəm, bu yalandır. “O, mənəm” mahnısı ilə gəldim, daha sonra ardı-ardına mahnılarım çıxdı. Yaradıcılığında Damla artıq tanınırdı, bundan sonra Şəfanın mahnısını oxudu.

- Bir çox müğənnilərimiz var ki, məsələn, Üzeyir Mehdizadə və digərləri öz ölkəsində birmənalı qarşılanmasa da, qonşu ölkələrdə məşhurluq qazana biliblər, mahnıları dillər əzbəri olur. Sizcə, səbəb nədir? Yəqin ki, bilirsiz, siz də birmənalı qarşılanmayan müğənnilərdənsiz....

- Bəzi xəbərlər yayılmışdı ki, Üzeyir məndən küsüb. Lakin sonra məlum oldu ki, artıq hər şey qaydasındadır. Lakin bir daha qeyd edirəm ki, onun məndən niyə küsdüyünün səbəbini bilmirəm... Doğrudur, əvvəllər birmənalı qarşılanmırdıq. Lakin şükürlər olsun ki, öz ölkəmizdə də, eləcə də xaricdə sevilirik.

- Toy dəvətlərini daha çox ölkəmizdə, ya xaricdən alırsız?

- Hər ikisində. Daha çox Rusiyadan dəvətlər alıram. Amma Qazaxıstan, Türkiyədən də çoxlu dəvətlər olur".