"Toplum TV işi" üzrə baş tutan növbəti məhkəmə prosesində də media eksperti Ələsgər Məmmədlinin səhhətində problemlər müşahidə olunub. 
Həyat yoldaşı Günay Məmmədlinin yaydığı məlumata görə, iyulun 20-də Bakı Ağır Cinayətlər Məhkəməsində baş tutan prosesdə Ə.Məmmədli ürək sancısından əziyyət çəkib. 
"Sancma zamanı zaldakılar fərq etməsə də, Ələsgər bəyin ani hərəkətindən yanında nəzarətçi qismində əyləşən Penitensiar Xidmət növbətçisi və digər şəxs də səksənib. [Demokratik Təşəbbüslər İnstitutunun rəhbəri və III Respublika Platformasının spikeri] Akif Qurbanov və bir neçə nəfər vəziyyəti görüb. Akif bəy çıxışını dayandıraraq həkim çağırılmasını istəyib. Məlum olub ki, həkim övladının problemi olduğu üçün orada olmayıb. Hakim Azər Tağıyev təcili yardım çağırmağı təklif edib, lakin Ələsgər Məmmədli hər zamankı kimi təvazökarlığı üstün tutaraq prosesi dayandırmayıb. Özü dərman qəbul edib", - G.Məmmədli sosial media hesabında yazıb. 
Daha sonra prosesdə fasilə elan olunub və Ə.Məmmədlinin açıq havaya çıxmasına icazə verilib. A.Tağıyev media ekspertinin qandalsız çıxarılmasına razılıq versə də, o, əsəbləşərək açıq havaya çıxmaqdan imtina edib. 
"Hər məhkəmə prosesində "korvalol", təzyiq dərmanları içir və bunu hakimlər daxil hər kəs görür. 65 məhkəmə prosesinin bəlkə də 60-ında səhhətlə bağlı vəsatətlər verilsə də, hər dəfə hakim bəhanə olaraq əsaslı həkim sənədi istəyir. Hansı həkim qorxusundan o sənədi verə bilər? Sadəcə şifahi olaraq hər dəfə əməliyyat olmalısız deyirlər", - həyat yoldaşı əlavə edib. 
Günay Məmmədli “Toplum TV“-yə bildirib ki, iyulun 21-də istintaq təcridxanasında Ələsgər Məmmədli ilə görüşüb. 
“Ələsgər Məmmədli dedi ki, dünənki məhkəmə prosesindən sonra vəziyyətim çox pis idi, kardioqrama edildi. Hələ cevabı çıxmayıb”, - deyə G.Məmmədli vurğulayıb.
"Toplum TV işi" üzrə ümumilikdə 10 nəfərə cinayət işi açılıb. Onlar öncə qaçaqmalçılıqda ittiham edilsələr də, sonradan ittiham ağırlaşdırılıb.
Özləri ittihamları rədd edir, siyasi sifariş əsasında həbs olunduqlarını bildirirlər.скачать dle 12.1