Martın 5-də Milli Televiziya və Radio Şurasının iclası keçirilib.

İclasda “Real Təhlil İnformasiya Mərkəzi” MMC-nin peyk yayımı üçün lisenziya verilməsi barədə müraciətinə baxılıb.

Şuranın qərarına əsasən, sözügedən mərkəzə ixtisaslaşmış (xəbər) kanal kimi peyk yayımı üçün müddətsiz lisenziya verilib.

“Real Təhlil İnformasiya Mərkəzi” MMC-nin baş direktoru jurnalist Mirşahin Ağayevdir.

Yeni xəbər kanalının “Real TV” adlanacağı bildirilir.

Novator.az xatırladır ki, ötən il dekabrın 28-də Milli Televiziya və Radio Şurası “Türkel TV”yə ölkə boyu yayımlanması üçün müddətsiz lisenziya verib. “Türkel TV” də xəbər televiziyası olacaq.

Hazırda bütün ölkədə yayılan 10 televiziya var: AzTV, “Mədəniyyət”, “İdman Azərbaycan”, İctimai Televiziya, ATV, “Space”, “Xəzər”, “Lider”, ARB, “CBC Sport”.

Milli Televiziya və Radio Şurası 2002-ci ildə televiziya və radio yayımı sahəsində dövlət siyasətinin həyata keçirilməsini təmin etmək və bu fəaliyyəti tənzimləmək məqsədilə yaradılıb.

Şura dövlət büdcəsindən maliyyələşdirilir. Onun 9 üzvü var. Üzvləri prezident təyin edir.

Qurumun sədri postunu 2003-cü ildən – Milli Televiziya və Radio Şurası yaranandan – Nuşirəvan Məhərrəmli tutur. Prezidentin köməkçisi Əli Həsənovun həyat yoldaşı Sona Vəliyeva isə 2011-ci ildən onun müavinidir.