Demokratik Qüvvələrin Milli Şurasının Koordinasiya Mərkəzinin üzvü, hüquq müdafiəçisi Oqtay Gülalıyev bu gün üç saata yaxın Azərbaycan Baş Prokurorluğunun Ağır Cinayətlər üzrə İstintaq İdarəsində dindirilib.

Hüquq müdafiəçisi dindirmədən çıxdıqdan sonra bildirib ki, onu mayın sonlarında qaçaqmalçılıq ittihamı ilə həbs edilmiş Xalq Cəbhəsi Partiyasının sədr müavini Gözəl Bayramlının işi üzrə dindiriblər.

“Amma istintaq bununla kifayətlənməyib. Mənə Bayramlının cinayət işindən kənar suallar da verilib”, deyə Gülalıyev bildirib.

İstintaq DQMŞ-nin fəaliyyəti və Gülalıyevin hüquq müdafiə işi ilə də maraqlanıb.

Ondan istintaq sirrinin yayılmaması haqqında iltizam alınıb və buna görə o, ətraflı şərh verə bilməyib.

Amir Nur