Maşına baxışda iştirak etmiş hal şahidləri niyə dindirilməyib?

“Azadlıq” qəzetinin həbsdə olan yayım direktoru Faiq Əmirlinin işi üzrə məhkəmə istintaqı yekunlaşmaq üzrədir. Hərçənd, bu iş üzrə ittiham tərəfin şahidlərinin təxminən yarısını məhkəməyə gətirib dindirmək mümkün olmadı. Baxmayaraq ki, məhkəməyə gəlməkdən imtina edən şahidlərə görə məhkəmə iclasları dəfələrlə təxirə salındı, hakim həmin şahidlər haqqında məcburi gətirilmə qərarı çıxartdı, yenə də xeyri olmadı. İyulun 17-də keçirilən məhkəməyə də yenə şahidlər gəlməmişdi.

Məhkəmə şahidlər qarşısında aciz qaldı

Qızmar yay günlərində, şəraitsiz dustaq maşınlarında Kürdəxanıdakı 1 saylı istintaq təcridxanasından məhkəməyə gəlib-getmək onsuz da səhhətində ciddi problemlər olan Faiq Əmirlinin dueumuna daha da pis təsir göstərir. Faiq Əmirlinin vəkili Fəxrəddin Mehdiyev bugünkü məhkəmə iclasında bu məqamı işə baxan hakim Aytən Əliyevanın nəzərinə çatdırıb. Vəkil bildirib ki, məhz sağlıq problemlərinə görə Faiq Əmirli məhkəmənin tez yekunlaşmasını istəyir. Hərçənd, onlar ittiham tərəfin bütün şahidlərinin də məhkəmədə dindirilməsini istəyirlər. Çünki məhkəməyə gələnlərin hamısı istintaqdakı ifadələrdən fərqli danışıblar. Başqa sözlə, şahidlər dindirildikcə, istintaqdakı saxtakarlıqlar daha çox ifşa olunur. Amma məhkəmə də şahidləri gətirib dindirməkdə acidir.
“Məhkəməyə şahidləri gətirmək mümkün olmur, bu səbəbdən məhkəmə prosesi uzanır, dəfələrlə təxirə salınır. Faiq Əmirlinin sağlıq durumu yaxşı deyil, ona görə məhkəmə prosesinin tez yekunlaşmasını istəyir. Bu səbəbdən məcburiyyət qarşısında qalıb, gəlməyən şahidlərin ifadələrinin elan olunması ilə kifayətlənə bilərik”, – deyə Fəxrəddin Mehdiyev bildirib.

Fətullah Gülən ittihamı ilə bağlı heç bir araşdırma yoxdur

Faiq Əmirli də vəkilinin fikirləri ilə razılaşıb və məhkəməyə gəlib-getməyin onun üçün çətin olduğunu söyləyib.
Ardınca vəkil Fəxrəddin Mehdiyev Faiq Əmirlinin avtomobilindən guya Fətullah Gülən haqqında kitablar və disklər aşkarlandığı baxışda iştirak etmiş hal şahidləri Samirə Məmmədova (Əhmədbəyli) və Təzəxan Mirələmlinin məhkəmədə dindirilməsi haqda vəsatət qaldırıb. Müdafiəçi bildirib ki, adları çəkilən hal şahidləri istintaqda da dindirilməyib. Halbuki, onların dindirilməsi vacib idi. Çünki Faiq Əmirlidən avtomobilinin açarının necə alınması, maşına necə baxış keçirilməsi, o kitab və disklərin ora necə qoyulması haqda vacib məlumatlara malik şahidlərdir: “Ən əsası, Faiq Əmirliyə CM-nin 283-cü maddəsi ilə verilmiş ittiham üzrə məhkəmədə heç bir araşdırma aparılmayıb”.
Prokuror vəsatətə etiraz edib. Deyib ki, maşına baxış prosesi videolentə alınıb. Ona görə də hal şahidlərinin dindirilməsinə ehtiyac yoxdur.
Hakim Aytən Əliyeva da prokurorun dediyi əsasla vəsatəti rədd edib.
Vəkil Fəxrəddin Mehdiyev ekspertiza ilə bağlı vəsatəti olduğunu bildirib və onun hazırlanması üçün məhkəmədən vaxt istəyib.
Məhkəmə iyulun 19-n təxirə salınıb.
F.Əmirli ötən il avqustun 20-də saxlanıb. Ona qarşı CM-nin 283.2.2-ci (milli, irqi, sosial, dini nifrət və düşmənçiliyin salınması) və 213.1 (xeyli miqdarda vergidən yayınma) maddələri ilə ittiham irəli sürülüb. İddia olunur ki, guya Faiq Əmirli “Azadlıq” qəzetində Fətullah Gülənlə bağlı təbliğat xarakterli materiallar yaymaq niyyətində olub, həmçinin qəzetin satışı ilə əlaqədar külli miqdarda vergidən yayınıb.
Lakin Faiq Əmirli də, vəkilləri də ittihamların absurd olduğunu bildirir. Məhkəmədə şahid ifadələri də ittihamın saxta olduğunu üzə çıxartdı. Məlum oldu ki, istintaq orqanı şahidlərin adından yalan ifadələr yazıb, “Azadlıq” qəzetinin satış qiyməti şişirdilərək, çap və kağız xərcləri, yayım firmalarının gəlir faizi nəzərə alınmadan qəzetə vergi hesablanıb.
Bir sıra yerli və beynəlxalq media təşkilatları da bəyan edib ki, Faiq Əmirlinin həbsi “Azadlıq” qəzetinin susdurulmasına yönəlmiş addım idi.
Faiq Əmirlinin həbsindən sonra qəzet nəşrini dayandırmaq məcburiyyətində qalıb.