Azərbaycan yenə də bütün Avropanın diqqət mərkəzində oldu. Təəssüf ki, hansısa iqtisadi və ya elmi nailiyyətinə görə yox. Milli Məclisin deputatı və Avropa Şurası Parlament Assambleyasında ölkənin nümayəndə heyətinin rəhbəri Səməd Seyidov qurumun korrupsiya qalmaqalını araşdırmasından sonra hamının dilinə düşdü.

Araşdırmaların yekunlarına əsasən AŞPA komitəsi korrupsiya ittihamı ilə əlaqədar Seyidov, Aqramunt, Preda və Xuclaya qarşı sanksiya tətbiq edib. Sanksiya nəticəsində azərbaycanlı deputat seçkilərin monitorinqində iştirak edə bilməz, AŞPA-da məruzəçi ola bilməz, komitə və alt komitələrə sədr seçilə bilməz, AŞPA-nı tədbirlərdə təmsil edə bilməz və AŞ Nazirlər Komitəsinə sorğular göndərə bilməz.

Baxmayaraq ki, sanksiyanın tətbiqinə dair xəbər srağagün yayılıb, S.Seyidov buna bir gün sonra reaksiya verib. Deputat özünə qarşı bütün ittihamları rədd edərək bildirib ki, bu ittihamların heç bir əhəmiyyəti yoxdur. Bundan əlavə, o deyib ki, sanksiyalar Qərbin ikili standartının təzahürüdür. Deputat AŞPA-da dindirmənin detallarından danışıb: "Bizə təzyiq göstərdilər ki, etiraf edək ki, burada başqa işlərlə məşğul oluruq, belə olarsa, adımız siyahıya düşməyəcək, sanksiya tətbiq etməyəcəklər. Təbii ki, biz etiraf etmədik. Çünki bu, doğru deyildi. Məhz buradan da onların məqsədi aydın olur. Onların niyyəti qərəzli idi və bunu da həyata keçirdilər".

AŞPA-da S.Seyidova qarşı sanksiyanı ümumilikdə ölkə rəhbərliyinə qarşı sanksiyaların başlanması kimi qəbul etmək olarmı? Azərbaycan Qərbin sanksiyasına nə ilə cavab verəcək?

Politoloq Hikmət Hacızadənin fikrincə, S.Seyidovla baş verənlər ölkə rəhbərliyinə qarşı Qərb sanksiyalarının başlanmasıdır. "Qorbaçovun dediyi kimi, proses getdi. Avropa korrupsiya, ələ almalar, kürü diplomatiyası ilə ciddi məşğul olmağa başlayıb. Proses güclənəcək və bu, bütün dünyada bütün istiqamətlər üzrə güclənir, təkcə Azərbaycana qarşı yox. Bu məqamda FİFA ilə qalmaqalı, offşorlar üzrə qərarları yada salmaq olar. Bu, dünya üzrə antikorrupsiya prosesidir ki, artıq dayandırmaq mümkün deyil. Çünki demokratik ölkələrin cəmiyyətləri öz hökumətlərindən təkcə daxili siyasətdə deyil, həm də xarici siyasətdə şəffaflıq tələb edirlər", - politoloq vurğulayıb. O hesab edir ki, sanksiyalar, o cümlədən maliyyə sanksiyaları artacaq və müxtəlif formalar alacaq. Azərbaycan da öz növbəsində Avropa Şurasından çıxmaqla hədələməyə başlayacaq.

"Hakimiyyət AŞ ilə diplomatik və iqtisadi əlaqələrin pozulması ilə hədələyir". Onlar deyəcəklər ki, "bizə belə Avropa əməkdaşlığı lazım deyil". Mən əminliklə deyə bilmərəm ki, Azərbaycan öz hədələrini həyata keçirəcək, ya yox. Əgər bu, baş verərsə, həm Qarabağ məsələsində, həm də digər məsələlərdə ölkəmiz üçün faciə olacaq", - H.Hacızadə vurğulayıb.

Politoloq Zərdüşt Əlizadə əmindir ki, S. Seyidovun ətrafında baş verənlər Azərbaycana qarşı sanksiyanın başlanması deyil.

"Bu, Seyidova və korrupsiyada şübhəli bildikləri digər deputatlara qarşı ümumi əməliyyatdır. Bununla da hər şey qurtaracaq. Səməd Seyidov deyir ki, öz təmiz adını geri qaytarmaq üçün mübarizə aparacaq. Ancaq mən başa düşmürəm ki, AŞPA ilə necə mübarizə aparmaq olar? Qərar qəbul olunub. Yenidən rüşvət verəcəklər ki, qərarı geri götürsünlər? Hesab edirəm ki, hər şey dəyişməz qalacaq, həm ölkə daxilində, həm də onun hüdudlarından kənarda. İri layihələrin həyata keçirilməsində, Milli Məclisə seçkilərdə Azərbaycanla bağlı böyük korrupsiya qalmaqalları hamıya məlumdur, hətta məhkəmə prosesləri də olmuşdu. Lakin bu, vəziyyətə heç bir təsir göstərmədi, çünki rüşvətxorluq artıq milli düşüncəyə çevrilib", - o vurğulayıb.

Politoloqun fikrincə, deputata qarşı sanksiya Azərbaycanın Avropa Şurası ilə münasibətlərinə heç bir təsir göstərməyəcək.
"Nə Azərbaycan təşkilatın tərkibindən çıxacaq, nə də AŞ Azərbaycanı kənarlaşdıracaq. Avropalılar bunda maraqlı deyil. Çünki ölkə üzvlük haqqı ödəyir, birgə iri layihələr həyata keçirir. Ümumilikdə, Azərbaycana qarşı sanksiya olmayacaq, çünki sözəbaxandır. Təkcə Rusiya Qərbin sözünə baxmır. Buna görə də ona qarşı müxtəlif təzyiq formaları tətbiq edilir. Azərbaycan Qərbin xoşuna gələn hər şeyi edir: Ermənistana toxunmur, Qərb ölkələrinə neft-qaz nəql edir və s. Sanksiya barədə unutmaq lazımdır", - Z.Əlizadə vurğulayıb.