Gəncə hadisələrində həbs edilmiş Aydın Qurbanov ölümcül xəstəliyə düçar olub.

Gəncə məhbusu ölümcül ayağındadır.İddia olunur ki,Aydın Qurbanov saxlandığı 1 saylı Bakı İstintaq Təcridxanasında onkolojı xəstəyə çevrilib.

O,artıq bir həftədir ki qida qəbul edə bilmir və mədəsindən qan gəlir.

Hazırda Penitensiar Xidmətinin Müalicə Mərkəzində olan Aydın Qurbanov mayın 12-də həyat yoldaşı Məhbubə Qurbanova ilə telefon əlaqəsi saxlayıb.

Bu barədə AzadliqRadiosuna danışan Məhbubə Qurbanova bildirib ki, Aydın Qurbanov mədə-bağırsaq ağrılarından əziyyət çəkir, çətin nəfəs alır, yeməkdən də faktiki kəsilib:

“Mən onun müalicə olunduğuna inanmıram, çünki heç bir müalicə getmir, adamı ay yarımdır MRT-yə ( MRT-Maqnit rezonans tomoqrafiya) salmırlar, bilinsin ki, daxili orqanların vəziyyəti necədir”.

“2 aydır yoldaşımın mədəsində qanaxmalar baş verib,...”

Məhbubə Qurbanovanın sözlərinə görə, yoldaşı Cinayət Məcəlləsinin 228.3 maddəsi ( Qanunsuz olaraq odlu silah əldə etmə, başqasına vermə, satma, saxlama, daşıma və gəzdirmə. Qabaqcadan əlbir olan bir qrup şəxs tərəfindən törədildikdə) ilə ittiham edilir:

“ 10 aydır istintaq davam edir, iyulun 28-də həbs olunub.Vəkili olsa da, ciddi müdafiə olunmur. Mənim müraciət etmədiyim dövlət orqanı qalmayıb, cavab yoxdur. 2 aydır yoldaşımın mədəsində qanaxmalar baş verib, amma xəbərimiz olmayıb, çünki əlaqə saxlaya bilməmişik. Yalnız onu deyirdilər ki, soyuqdəyməsi var, Kürdəxanı təcridxanasında onun səhhəti ilə ciddi məşğul olmayıblar, indi də Müalicə Mərkəzinə gətiriblər. Bu, ölüm cəzasıdır. Aydın həbs olunanda sağlam idi, necə oldu ki, indi qanaxması var? Həkim də deyir şiş var…”.

“Mənzildən çıxarıldıq,.. oğlum da oxuduğu universitetindən uzaqlaşdı”

M.Qurbanova hazırda kirayədə yaşadıqlarını söyləyir:

“Biz ipoteka krediti ilə mənzil almışdıq, Aydın həbs olunandan sonra 5 il yaşadığımız mənzildən çıxarıldıq, çünki pulu verə bilmədik. Oğlum da oxuduğu Gəncə Dövlət Universitetindən uzaqlaşdı, çünki uşağı oxutmağa maddı imkanımız yox idi”.

Məhbubə Qurbanovanın bu dediklərinə, hələlik, Penitensiar Xidmətdən və bu qurumun Müalicə Mərkəzindən münasibət almaq mümkün olmayıb.