"Azərbaycanda qeydiyyatdan keçən siyasi partiyaların sayının çox olması hamıya məlumdur, bu partiyaların böyük əksəriyyətinin heç bir fəaliyyətinin olmadığını bilməyən yoxdur. Əlbəttə, partiyaların birləşməsi və fəaliyyət qabiliyyətli bir neçə böyük partiyanın qalması daha yaxşı olardı. Ancaq bu partiyaların birləşməyə meyillilərinin olmaması da məlumdur. Partiya sədri olmaq, özünü cəmiyyətə partiya sədri kimi təqdim etmək hələ də çoxları üçün kifayət qədər cazibədar görünür. Bu statusdan heç kim imtina etmək istəmir".

Bunu Pravda.az-a açıqlamasında Azərbaycan Naminə Alyans Partiyasının sədri Abutalıb Səmədov deyib.

A.Səmədov sədri qeyd edib ki, Azərbaycanda partiyaların sayının azalması və normal partiyaların fəaliyyət göstərməsi üçün ilk növbədə "Siyasi partiyalar haqqında" qanunda dəyişiklik etmək lazımdır: "Bununla bağlı tələblər bir qədər sərtləşməlidir. Elə tələblər qoyulmalıdır ki, siyasi partiyalar fəaliyyət göstərmək məcburiyyətində qalsınlar. Onların qeytiyyatdan keçməsi üçün tələb olunan üzv sayı da artırılmalıdır. Bundan əlavə, seçkilərdə iştirak etməyən partiyaların qeydiyyatı məsələsinin ləğv olunması nəzərdə tutulmalıdır. Yalnız adı olan partiyaların birləşmək məcburiyyətində qalması üçün qeyd olunan məsələlərlə yanaşı, digər məsələlər də siyasi partiyalar haqqında qanunda əksini tapmalıdır ki, yalnız partiya sədri olması ilə fəxr edənlər siyasi fəaliyyətlərini davam etdirmələrinin mümkünlüyü üçün bundan sonra başqa yollar axtarmaq məcburiyyətində qalsınlar. Onlar həqiqətən də siyasi fəaliyyətlə məşğul olmaq və siyasətdə qalmaq istəyirlərsə, özləri digər partiyalarla birləşməyə meyilli olsunlar. İnsanların siyasi partiyalara qoşulmağa marağı olsun deyə, proporsional seçki sistemi mütləq hansısa formada bərpa olunmaldır. Açıq demək lazımdır ki, bizdə əhalinin böyük əksəriyyətinin siyasi partiyalara heç bir marağı yoxdur. Proporsional sistem onlara seçkilərdə iştirak imkanı versə, təbii ki, insanlar partiyalara gəlmək və partiyalarda fəaliyyətlərini davam etdirmək istəyində ola bilərlər. Yəni bu kimi bir çox məsələlər var ki, həll olunmalıdır. Yalnız bundan sonra Azərbaycanda siyasi partiyaların sayı azala bilər. Onların sayı isə mütləq azalmalıdır. Ancaq qeyd etmək lazımdır ki, belə tendensiya bütün dünyada mövcuddur. Digər ölkələrdə də tanınan bir neçə partiya olduğu halda, ümumi sayı çoxdur. Təkcə Türkiyədə 100-dən çox partiya var. Cəmiyyətin isə onlardın sadəcə 5-10-nu tanıyır. Yəni digər ölkələrdə də eyni vəziyyət var. Beləliklə yalnız siyasi partiyalar haqqında qanun qəbul olunduqdan sonra bu istiqamətdə real iş başlaya və Azərbaycanda həqiqətən də ciddi partiyalar meydana gələ bilər. Elə partiyalar ki, sanballı sədri, liderləri olar və onlar yalnız bir, yaxud da iki nəfərlə tanınmazlar".