Milli Şuranın Koordinasiya Mərkəzinin üzvü Gültəkin Hacıbəyli

İllərdir biz bunları deyirdik, o lənətə gəlmiş neftin istibdadın dirəyi olduğunu anladırdıq, neft oliqarxiyalarının öz xalqlarına və insanlığa yaşatdığı zülmün neftin dünya bazarındakı qiyməti ilə düz mütənasib olduğunu yazırdıq!

2008-ci ildə neft qiymətləri kəllə-çarxa vuranda Rusiya Gürcüstana təcavüz etmədimi?! Həmən ardınca Azərbaycanda Konstitusiya Referendumu ilə əbədi hakimiyyətin yolu açılmadımı?!

2014-cü ildə neftin qiyməti yenidən 130 dolların üstünə qalxanda nə oldu?

Rusiya Krımı işğal etdi!
Azərbaycanda vətəndaş cəmiyyətinin üzərinə yaxın tarixin ən dəhşətli basqısı, repressiyaları gerçəkləşdirildi.

İndi, nəhayət ki, anladılar!
Amma nədən sonra!
Qos-qoca Bayden Səudiyyə vəliəhdi və baş naziri Muhamməd bin Salmanın ayağına- ər-Riyada gedib neftin istehsalını artırmaqla qiymətini aşağı salmaq ricasında bulundu və…rədd cavabı aldı.

Niyə, çünki, hətta Səudlar da dərk edir ki, söhbət Putin davası deyil, avtoritarizm davasıdır və hər nə qədər ABŞ-la strateji tərəfdaş olsalar da Putinlə onları dövlətlərinin milli maraqlarından da üstün maraq birləşdirir: əbədi hakimiyyət marağı.

Və budur, ABŞ-ın ən nüfuzlu siyasətçilərindən biri, Obama dönəmində Dövlət Katibinin Demokratiya, İnsan Hüquqları və Əmək məsələləri üzrə müavini olmuş, hazırda Nümayəndələr Palatasının demokrat üzvü Tom Malinovski etiraf edir:

“Uzun illər, bəlkə də onilliklər ərzində biz dəyərlərimizlə alver edərək onları neftə dəyişmişik. Və indi belə görünür ki, biz dəyərlərimizi heç neftə də dəyişə bilmirik.

Səudiyyə Ərəbistanı bizim qlobal enerji bazarlarının sabitliyindəki maraqlarımızı qorumaq üçün etməli olduğu tək bir şeyi də etmir”.

Lənətə gəlmiş neft diktatorların təkcə sərvətini deyil, gücünü, qüdrətini artırıb onları daha da azğınlaşdırdı, amma məzlum xalqlara bədbəxtlikdən başqa heç nə vermədi(((.