Azərbaycanda oktyabrın 18-də qeyd olunan Müstəqilliyin Bərpası Günü münasibətilə xarici diplomatik missiyaların rəhbərləri təbrik mesajları paylaşıblar.

“Bu il ABŞ və Azərbaycan arasında diplomatik münasibətlər qurulmasının 30 illiyini qeyd edirik.

Azərbaycan müstəqillik əldə etdiyi andan etibarən 30 ildir biz enerji təhlükəsizliyi, transmilli təhdidlərə qarşı mübarizə, ikitərəfli ticarətin inkişafı və investisiyaların artırılması, əsas azadlıqlara dəstək sahəsində birgə işi davam etdiririk.

Yuxarıda qeyd edilənlərlə yanaşı, biz əvvəlki kimi Azərbaycanda və bütünlükdə Cənubi Qafqazda dinc və firəvan gələcəyin təmin edilməsinə sadiqik.

Birləşmiş Ştatların adından Azərbaycan xalqını Müstəqillik Günü münasibətilə təbrik edirik”, deyə ABŞ-ın Azərbaycandakı müvəqqəti işlər vəkili Gevara yazıb.

Böyük Britaniyanın Azərbaycandakı səfiri Fergus Ould səfirliyin saytında təbrik videoçarxı yayımlayıb.

“Bu gün Azərbaycan tarixində həqiqətən də əlamətdar gündür. 31 il əvvəl Azərbaycan yenidən müstəqillik əldə edib. Bu gözəl ölkə 70 il SSRİ-nin hakimiyyəti altında yaşayıb, amma öz mədəniyyətini və dəyərlərini qoruyub saxlayıb”, deyə səfir bildirib.

“Son 30 il ərzində biz mədəniyyət, iqtisadiyyat, ekologiya, təhsil, energetika kimi müxtəlif sahələrdə əməkdaşlıq etmişik. Bu əməkdaşlıq ildən-ilə genişlənir, ölkələrimiz və xalqlarımız arasında dostluq möhkəmlənir. Azərbaycanı Müstəqillik Günü münasibətilə təbrik edirəm”, deyə F.Ould bildirib.

Almaniya səfiri Ralf Horlemann öz təbrikində belə yazıb:

“Azərbaycan Respublikasına müstəqilliyini bərpa etməsinin 31-ci ildönümü münasibətilə səmimi təbriklərimi çatdırmaq istəyirəm. Müstəqillik Gününüz mübarək!”.

Eyni zamanda, Türkiyə, Ukrayna, İsrail, Fələstin, Fransa və digər ölkələrin səfirləri təbrik mesajları dərc ediblər.

Oktyabrın 18-də Azərbaycanda Müstəqilliyin Bərpası Günü qeyd olunur.

31 il əvvəl – 18 oktyabr 1991-ci il tarixində Azərbaycan Parlamenti Azərbaycanın dövlət müstəqilliyinin bərpa olunması haqqında Konstitusiya Aktı qəbul edib.

Bu sənədlə Azərbaycan Respublikası 1918-20-ci illərdə mövcud olan, bolşevik Rusiyasının işğalı nəticəsində süqut edən Azərbaycan Demokratik Respublikasının varisi elan olunub.

Konstitusiya Aktına əsasən, milli və dini mənsubiyyətindən asılı olmayaraq, bütün vətəndaşlara tam bərabərhüquqluluq zəmanəti verilirdi. 2006-cı ilə qədər 18 Oktyabr qeyri-iş günü idi. Amma 2006-cı ildə parlament qanunvericiliyə dəyişiklik edərək, 18 Oktyabrı bayram günləri siyahısından çıxarıb.

Contact.az