AXCP Rəyasət Heyətinin üzvü Fuad Qəhrəmanlı

Görmüsünüz ki, bir demokratik ölkədə hakimiyyət etiraz edənləri hansısa xarici ölkəyə bağlaya, onları etiraz etdikləri üçün Vətənə xəyanətdə, düşmənə xidmətdə ittiham edə? Yox, ola da bilməz. Çünki, insanların hansısa ölkəyə simpatiyası olub olmaması onların öz işidir və etiraz, sərbəst toplaşmaq haqqını buna görə məhdudlaşdırmaq olmaz. Maraqlıdır ki, demokratik ənənəyə malik , rifahın təmin olunduğu cəmiyyətlərdə insanlar öz ölkələrində özlərini rahat, məmnun hiss etdikləri üçün, heç başqa ölkələrin də tərəfdarına, simpatizanına çevrilmirlər. Bu cür hallar insanları öz həyatından, məmləkətindən küsdürən avtoritar rejimlərin hökm sürdüyü ölkələrə məxsus mənfi haldır.
Əgər, ortada hər hansı xarici dövlətlə məxfi əməkdaşlıq varsa, ölkənin milli təhlükəsizlik maraqlarına qarşı kənar qüvvələrlə işbirliyi həyat keçirilirsə, bunu müəyyən etmək və məsuliyyətə cəlb etmək, xüsusi xidmət orqanlarının işidir. Gözümüzün qabağında hətta bərkiməmiş demokratiyası olan Ermənistanda belə açıq aşkar Rusiyaya bağlı olan Köçəryanın liderlik etdiyi ruspərəst müxalifətə belə “sən Rusiyaya xidmət edirsən” deyib mitinq keçirmək haqqını əlindən almırlar.
Bizdə isə xalqın sərbəst toplaşmaq azadlığını tələb etmək üçün aksiya təyin edən kimi, hökumətin “siyasi polisləri” sosial şəbəkələrə tökülüşüb başlayırlar ki, bəs bu dövlətçiliyə qarşıdır, xarici dairələrin sifarişidir. Beləcə “siyasi çavuşlar” söz dubinkasını ələ alaraq başlayırlar “mitinqi dağıtmağa”.
Belə çıxır ki, ölkə konstitusiyası və sərbəst toplaşmaq azadlığı ilə müəyyən olunmuş hüquq, azadlıqlardan istifadə etmək Vətənə xəyanət imiş, xarici dövlətlərə işləmək imiş. Bu Stalinist düşüncə ilə ölkəni diktaturaya sürükləmək istəyənlər ancaq hələ bir dəfə deməyiblər ki, bəs nə vaxt vətəndaşlar öz sərbəst toplaşmaq azadlığından istifadə edəndə, bu Qərbə işləmək, dövlətçiliyə qarşı gəlmək sayılmır ?
O zaman zəhmət çəkib qanuna bunun şərtlərini də yazsınlar ki, biz də işimizi bilək. Məsələn, “Sərbəst toplaşmaq azadlığı haqqında qanuna” yazmaq olar ki, Qaradağ da mitinq keçirmək dövlət maraqlarına uğundur, ancaq, Bakıda “Qələbə” meydanında aksiya etmək Vətənə xəyanət, xarici maraqlara xidmət etməkdir. Belə olarsa biz də, “siyasi polislər” işini bilər.
Yuxarıda dedik axı, bütün demokratik ölkələrdə insanların etiraz aksiyaları keçirməsi normal, adi bir hal sayılır. Ancaq avtoritar rejimlərdə hakimiyyətlər bilirlər ki, xalqı əzirlər, soyub talayırlar, ona görə də öz, siyasətlərinin yaratdığı ictimai narazılığı gizlətmək üçün ya etiraz hüququnu boğurlar, ya da ki, etiraz edənləri xarici ölkələrə bağlayamaqla, guya ölkədə narazılıq üçün heç bir səbəb olmadığını, xaricdən gələn sifarişlə aksiyalar keçirildiyini idda edirlər.
Biz isə “siyasi polislər”in nə deməsindən asılı olmayaraq, ölkəmizin normal inkişaf yoluna çıxması, köklü demokratik islahatlar keçirilməsi və sərbəst toplaşmaq haqqımızın bərpası tələbi ilə bu ayın 24 də saat 4-də BŞİH qarşısında növbəti etiraz aksiyamızı keçirəcəyik.
Ya azadlıqlarımızın əlimizdən alınması ilə barışmalı, ya da ki, mübarizə apararaq onların geri qaytarılmasına nail olmalıyıq.