Türkiyə prezidenti Rəcəb Tayyib Ərdoğan və Rusiya prezidenti Vladimir Putinin Ankarada təkbətək və heyətlərarası görüşlərindən sonra Prezident Kompleksində birgə mətbuat konfransı keçirilib.

Ərdoğan keçirdikləri görüşlərdə Türkiyə-Rusiya arasındakı ikitərəfli əlaqələri və regional məsələləri müzakirə etdiklərini söyləyib.

Ərdoğan, "dəyərli dostum", - deyə xitab etdiyi Putin ilə il ərzində 5-ci dəfə görüşdüklərini və gündəmlərindəki mövzular haqqında da tez-tez telefonla müşavirə apardıqlarını bildirərək, "bunlar təbii ki, Türkiyə-Rusiya arasında bu günə qədər olmayıb və təəssüf yaradır. İndi isə daha yaxşı mövqeyə çatıb" söyləyib.

Nazirlərin rusiyalı həmkarları ilə əlaqələrini davam etdirdiklərini, ortaq səylər nəticəsində iki ölkə arasındakı münasibətlərin güclənərək davam etməsindən məmnun olduqlarını söyləyən Ərdoğan, "İnşallah önümüzdəki dövrdə bunu  daha çox inkişaf etdirəcəyik. Bu qərar hər iki tərəfdə də var", - deyə bildirib.

Daha sonra İraq və Suriya məsələsinə toxunan Türkiyə prezidenti belə söyləyib:

"İraq və Suriya da daxil olmaqla bəzi məsələləri müzakirə etdik. İstər İraq, istərsə də Suriyanın ərazi bütövlüyündə həmfikirik. Təəssüf ki, son dövrlər bölgəmiz daha gərgin vəziyyətə gəlib. Referendumun İraq Konstitusiyası və hüquqi baxımdan heç bir legitimliyi yoxdur. Təəssüf ki, Kürdüstan rəhbərliyi bütün dostyana münasibətlərə baxmayaraq referendum keçirdi və səhvə yol verdi. Hər zaman dediyimiz kimi, şəxsi, qısamüddətli maraqlar naminə heç kimin bölgəmizdə gərginliyi artırmağa haqqı yoxdur.

Türkiyə və Rusiya olaraq Suriya probleminin siyasi yolla həlli ilə əlaqədar birgə iradə və yaxın əməkdaşlığımızı davam etdirmək yönündə qərarlığımızı bir daha söylədik."

Putin isə çıxışında bildirib ki, Suriyaya dair razılaşmaların əldə olunması – Rusiya və Türkiyənin ümumi uğurudur, bu ölkədə müharibənin dayandırılması üçün, faktiki olaraq, artıq lazımi şərait yaradılıb. V.Putin qeyd edib ki, terrorçuların məhv edilməsi və suriyalıların dinc həyata qayıtması yalnız region üçün deyil, bütün dünya üçün prinsipial məsələdir.